fbpx

聖誕聯歡會順利舉行 7個難忘的環節你記得幾多

聖誕聯歡會順利舉行

多謝大家的支持,我們藍豆教育中心的聖誕聯歡會2019已於12月20日星期五順利舉行。補習社都有聖誕派對?係呀!當日好開心唔使上功課輔導班,一班老師和小學同學都玩得非常開心,有遊戲玩,有好嘢食,有禮物,夠晒開心。開完 Party 就正式放長假啦!今年有幾多難忘的事你記得?一齊同你數一數:

聖誕聯歡會2019

盛裝出席 Party 便服日

平常日子同學來補習班之前是返學的,所以來補習班的時候一般都是學校放學後,亦都會穿著住校服。

12月20日可能同學來補習社之前學校已經放假,又或是剛好這天也是學校的聖誕聯歡會,聖誕 Party 係難得可以著便服返學嘅一日!而且很多學校都有聖誕主題,同學都盛裝打扮返學。就算無主題,聯歡會當日大家都會著靚靚返學,女仔戴住五顏六色的頭飾、媽咪幫手扎的孖辮仔,男仔著住帥氣嘅裇衫、冷衫、仲有最型最潮嘅波鞋或者閃令令的皮鞋。咁學校的 Party 完結後,「轉場」落嚟藍豆,自然都係著住「戰衣」出席,男仔個個都咁有型,女仔個個都咁可愛啦。

與別不同的集體遊戲

我哋補習社地方唔大,估領袖爭凳仔老師話糖痴豆大風吹收買佬等等經典集體遊戲,留返大家在學校玩。我哋比較斯文,彈彈波入紙杯,迷你保齡球等「桌遊」,都係幾好玩的。當日的集體遊戲,你又玩過幾多個?

當日勝出遊戲的,大家又記唔記得係邊個同學?

交換禮物你有冇份?

聖誕Party必備,梗係「交換禮物」!

不過呢好多同學仔完全忘記咗呢件事,無得交換,真係想喊出嚟呀~

有交換禮物的,自然開心啦。

收到的禮物是否喜歡,確實有人歡喜有人愁,這也是「學習」和「品味」人生的一種。大家又學到嘢啦。

下年要記得啦!大家俾心機準備一份又實用又好睇嘅禮物,施比受更有福!

唔等洗聖誕禮物包

交換禮物結果未能盡如人意?唔緊要!

藍豆送你人人都有嘅聖誕禮物包!因為人數多,都唔可以太名貴。希望大家,尤其是家長,唔好嫌「唔等洗」。

反過來說,平日家長都唔會買啲唔等洗嘅東東俾小朋友,但其實這些小玩具,手指陀螺,USB電燈,文具等,同學收到都超興奮,嘩嘩聲嘈到拆天,差點被隔離投訴!

人人有份的聖誕卡

雖然唔太環保,但小朋友一次過寫幾十張聖誕卡寫曬俾全班同學,既可以「練字」,又可以「創作」,幾好架。雖然有些補習班同學唔係咁熟,但得一句「Merry Christmas」嘅又點會夠?

鼓勵小朋友在聖誕卡上畫畫、貼貼紙,發揮創意好重要!

而家收到一張手寫聖誕卡,其實非常難得,係一個非常有心的祝福和心意。

校長沒有扮聖誕老人

通常學校校長在聖誕聯歡會,校長就會痴住厚厚嘅白鬍鬚、著住紅噹噹嘅聖誕老人服裝「Ho!Ho!Ho!」咁行出嚟禮堂派糖。

Sorry 因為我哋主理人 Miss Lo 是女性,身材比較矮小,著住聖誕老人服裝,肯定好怪!所以,每日企喺中心門口同你講「你好」嘅補習社校長,依然是企喺中心門口,沒有扮聖誕老人。抱歉令你失望了。

食飽沒有菠蘿腸仔

好多時以為別的家長會整,自己不整結果原來個個都唔整。菠蘿腸仔呢一種歡樂聖誕人間美食,結果今年沒有。

下年大家好好準備,咖哩魚蛋、燒賣、啫喱糖、雞翼、三文治,仲有最重要菠蘿腸仔!

珍惜童年時光 最純淨的聖誕聯歡會

咁簡單咁開心的聖誕聯歡會,很多家長都慨嘆出嚟做野就再冇咁無憂無慮嘅聖誕Party㗎啦,所以小朋友仲讀緊書,就要好好珍惜啦。


祝大家有個歡樂聖誕。

現在加送群星合唱《聖誕聯歡會》一曲: